“Qarabağ”ın 6-cı qızılı və tarixi
Ağdamın “Qarabağ” futbol komandası 6-cı dəfə Azərbaycan çempionu adını qazanıb. Novator.az-ın məlumatına görə, aprelin 22-də milli çempionatın 24-cü turuna yekun vurulub. Səfərdə “Sumqayıt”la üz-üzə gələn “Qarabağ” 1:0 hesablı qələbə qazanıb və xal sayını 59-a çatdıraraq sona 4 tur qalmış izləyiciləri üçün əlçatmaz olub.
1992-ci ildən müstəqil Azərbaycanın futbol çempionatının yüksək dəstəsində mübarizə aparan “Qarabağ” 1993, 2014, 2015, 2016, 2017-ci illərdə də çempionluq titulu əldə edib. Komanda həmçinin 1993, 2006, 2009, 2015, 2016, 2017-ci illərdə Azərbaycan kubokunu qazanıb.
“Qarabağ” komandasının əsası 1951-ci ildə qoyulub. “Məhsul” adı altında çıxış edən komanda 1966-cı ildən Azərbaycan SSR-in çempionatlarında yarışıb.
1968-ci ildən komanda respublika çempionatlarında təmsil olunmayıb. 1977-ci ildə “Şəfəq” adı ilə bərpa edilən komanda yenidən respublika çempionatlarında oynayıb.
1982-ci ildən komanda “Kooperator” adı daşıyıb. “Qarabağ” adı alandan sonra komanda 1988-ci ildə Azərbaycan SSR-in çempionu olub.
1989-cu və 1991-ci illərdə “Qarabağ” SSRİ çempionatının 2-ci dəstəsində yarışıb.
1993-cü ildə Ağdam şəhəri işğal olunduqdan sonra komanda köçkün klub kimi fəaliyyət göstərir, hazırda Bakıda məskunlaşıb.
Komanda 2014-2015, 2015-2016 və 2016-2017 mövsümlərində Avropa Liqasının qrup mərhələsində, 2017-2018 mövsümündə Çempionlar Liqasının qrup mərhələsində oynayıb.
2008-ci ildən “Qarabağ”ın baş məşqçisi postunu Qurban Qurbanov tutur. O, ötən il noyabrın 3-dən Azərbaycan milli futbol komandasının da baş məşqçisidir.
46 yaşlı Qurban Qurbanov futbolçu karyerası ərzində Azərbaycanın “Daşqın”, “Turan”, “Kür-Nur”, “Neftçi”, “İnter”, Gürcüstanın “Mertsxali”, “Alazani”, Rusiyanın “Dinamo” (Stavropol), “Fakel”, “Baltika”, “Volqar” klublarında hücumçu mövqeyində çıxış edib. Azərbaycan milli komandasının heyətində 67 oyun keçirib və 14 qol vurub.
2006-cı ildə futbolçu karyerasını başa vuran Qurban Qurbanov “Qarabağ”a gəlməzdən əvvəl Bakının “İnter” klubunda idman direktoru, “Neftçi”də baş məşqçi və idman direktoru vəzifələrini tutub.
Azərbaycanın milli futbol çempionatı 1992-ci ildən keçirilir. İndiyədək 8 dəfə “Neftçi”, 3 dəfə “Kəpəz”, 2 dəfə “Şəmkir”, 2 dəfə “Bakı”, 2 dəfə “İnter”, 1 dəfə “Turan”, 1 dəfə “Xəzər Lənkəran” çempion olub.
2001-2002 mövsümü yarımçıq qalıb, növbəti mövsüm isə çempionat keçirilməyib.
