Paşinyan və daha iki deputat azadlığa buraxıldı
Ermənistanda Serj Sərkisyanın hakimiyyətdən getməsi tələbi ilə başlayan hərəkatın lideri Nikol Paşinyan azadlığa buraxılıb.
42 yaşlı Nikol Paşinyan uzun illər jurnalist fəaliyyəti ilə məşğul olub. 2009-2011-ci illərdə həbsdə yatıb. 2012-ci ildə sabiq prezident Levon Ter-Petrosyanın rəhbərlik etdiyi Erməni Milli Konqresindən, 2017-ci ildə “Çıxış” blokundan deputat seçilib.
Vətəndaş Sazişi Partiyasının sədri olan Nikol Paşinyan martın 31-dən aprelin 13-dək Gümrü, Spitak, Dilican, Sevan, Razdan şəhərləri boyunca Serj Sərkisyanın əleyhinə yürüş keçirib. Aprelin 13-dən Yerevanda onun başçılığı ilə keçirilən davamlı aksiyaların tələbi Serj Sərkisyanın hakimiyyətdən əl çəkməsidir.
Aprelin 16-da Nikol Paşinyan polisin aksiyalara müdaxiləsi nəticəsində əlindən yaralanıb. Dünən onun baş nazir Serj Sərkisyanla qısa görüşü olub. Müxalif lider baş nazirin istefası tələbində israr etdiyi üçün dialoq yarımçıq kəsilib. Həmin gün polis şəhərin mərkəzində nümayişçilərə qüvvə tətbiq edib, 300-ə yaxın aksiyaçı, o cümlədən Nikol Paşinyan, “Çıxış” blokundan deputatlar Ararat Mirzoyan, Sasun Mikaelyan tutulub. Ancaq yürüş-mitinqlərin qarşısını almaq mümkün olmayıb. Gecə saatlarına qədər Respublika meydanında mitinq keçirən müxaliflər aksiyaların davam etdirilməsinə çağırıblar. Bu gün Yerevanı yenə aksiyalar bürüyüb.
Novator.az-ın məlumatına görə, aprelin 23-də baş nazirin birinci müavini Karen Karapetyan saxlandığı polis məntəqəsində Nikol Paşinyanla görüşüb. Bundan dərhal sonra Nikol Paşinyan, Ararat Mirzoyan və Sasun Mikaelyan azadlığa çıxıblar.
Serj Sərkisyan 2008-ci ildən bu il aprelin 9-dək prezident postunu tutub, aprelin 17-si parlamentdə baş nazir seçilib və prezident sərəncamı ilə bu posta təsdiqlənib. Ölkə parlament idarə üsuluna keçdiyi üçün icra hakimiyyətinə rəhbərlik baş nazirə ötürülüb.
