Ən gənc titulu kimə keçdi?
Prezident İlham Əliyevin yeni təyinatları Nazirlər Kabinetində gənclərin sayını artırıb. Novator.az-ın məlumatına görə, Ramin Quluzadə ən gənc kabinet üzvü titulunu itirib. Nəqliyyat, rabitə və yüksək texnologiyalar naziri postunu tutan Ramin Quluzadə 1977-ci ildə anadan olub.
Dövlət başçısının 21 aprel sərəncamı ilə kənd təsərrüfatı naziri təyin olunan İnam Kərimov da (Vətəndaşlara Xidmət və Sosial İnnovasiyalar üzrə Dövlət Agentliyinin sədri idi) 1977-ci il təvəllüdlüdür.
Aprelin 21-də Mənzil İnşaatı Dövlət Agentliyinin direktorluğundan Dövlət Şəhərsalma və Arxitektura Komitəsinin sədri postuna gətirilən Samir Nuriyev 1975-ci ildə doğulub.
Ən gənc kabinet üzvü titulu isə Sahil Babayevə keçib. Aprelin 21-də əmək və əhalinin sosial müdafiəsi naziri postuna gətirilən (bu təyinatadək iqtisadiyyat nazirinin müavini idi) Sahil Babayev 1980-ci ildə anadan olub.
Nazirlər Kabinetində yaşı 50-dən az olan başqa şəxslər də var.
Xarici Kəşfiyyat Xidmətinin rəisi Orxan Sultanov 1977-ci il təvəllüdlüdür.
Vergilər naziri Mikayıl Cabbarov 1976-cı ildə anadan olub.
Energetika naziri Pərviz Şahbazov 1969-cu ildə, mərkəzi icra hakimiyyəti orqanı olan Qida Təhlükəsizliyi Agentliyinin sədri Qoşqar Təhməzli 1970-ci ildə doğulub.
Novator.az onu da bildirir ki, aprelin 21-də Qaçqınların və Məcburi Köçkünlərin İşləri üzrə Dövlət Komitəsinin sədri təyin olunan deputat Rövşən Rzayev 1962-ci ildə doğulub.
Nailə Abdullayeva
