Bir qrup hərbçi Sərkisyandan üz döndərdi
Aprelin 23-ü Yerevanda Ermənistanın baş naziri Serj Sərkisyanın istefası tələbi ilə keçirilən aksiyaya bir qrup hərbi qulluqçu da qoşulub. Novator.az-ın məlumatına görə, aksiyaya dəstək verən hərbi qulluqçuların paytaxtdakı sülhməramlı briqadada xidmət etdiyi bildirilir.
Yerevan Dövlət Universitetinin, Amerika Universitetinin, Rusiya-Ermənistan Universitetinin, Fransız Universitetinin, Pedaqoji Universitetin, Tibb Universitetinin və başqa ali təhsil ocaqlarının tələbələri aprelin 23-də paytaxtın küçələrinə axışıb. Şəhərin mərkəzində yürüş keçirən tələbələr tutulan aksiyaçıların dərhal azadlığa buraxılmasını, Serj Sərkisyanın baş nazir postundan istefa verməsini, növbədənkənar parlament seçkisi təyin olunmasını tələb edirlər.
Aprelin 13-dən başlayan davamlı aksiyalarda Serj Sərkisyanın hakimiyyətinin uzanmasına etiraz bildirilir. Aksiyalara parlamentdə 9 deputatla təmsil olunan müxalif “Çıxış” blokunun lideri, Vətəndaş Sazişi Partiyasının sədri Nikol Paşinyan başçılıq edib. Aprelin 22-də Nikol Paşinyan, “Çıxış” blokundan deputatlar Ararat Mirzoyan, Sasun Mikaelyan tutulub. Onlara cinayət işi qaldırılıb.
Serj Sərkisyan 2008-ci ildən bu il aprelin 9-dək prezident postunu tutub, aprelin 17-si parlamentdə baş nazir seçilib və prezident sərəncamı ilə bu posta təsdiqlənib. Ölkə parlament idarə üsuluna keçdiyi üçün icra hakimiyyətinə rəhbərlik baş nazirə ötürülüb. Nikol Paşinyan və tərəfdarları Serj Sərkisyanın hakimiyyətdən getməsini tələb edirlər.
Serj Sərkisyan 1954-cü ildə Azərbaycanın Dağlıq Qarabağ Muxtar Vilayətinin mərkəzi şəhəri Stepanakertdə (Xankəndi) doğulub. O, Azərbaycana qarşı işğalçı müharibənin qaniçən liderlərindən biridir. 1989-1993-cü illərdə Dağlıq Qarabağdakı separatçı hərbi qüvvələrin komandanı, 1993-1995 və 2000-2007-ci illərdə Ermənistanın müdafiə naziri olub.
