Baş nazir maşın karvanından imtina etdi
Qırğızıstanın yeni baş naziri Məhəmmədqalıy Əbilqazıyev maşın karvanından imtina edib. Novator.az-ın məlumatına görə, hökumət başçısı bu addımı ilə paytaxt Bişkekdə tıxacları azaltmaq işinə töhfə vermək istədiyini bildirib.
Əvvəlki baş nazirlər Omurbek Babanov və Sapar İsakov da maşın karvanından imtina etmişdilər.
Qırğızıstan parlamenti Məhəmmədqalıy Əbilqazıyevi baş nazir postuna aprelin 20-də təyin edib.1968-ci il təvəllüdlü Məhəmmədqalıy Əbilqazıyev bu posta Prezident Aparatının rəhbəri postundan gətirilib.
Novator.az bildirir ki, ötən ilin payızından ölkə prezidenti olan Sooronbay Jeenbekov öz maşın karvanının hərəkəti zamanı paytaxtda yolu tam bağlamağı qadağan edib. Dövlət başçısı işə saat 7:45-də getdiyi üçün sürücülərə çətinlik yaratmaq istəmədiyini açıqlayıb.
Səidə Hüseynova
