Azərbaycana yeni baş nazir təyin olunur
Azərbaycana yeni baş nazir təyin edilir.
Məlum olduğu kimi, aprelin 18-də İlham Əliyevin yeni prezidentlik dönəmi başlayıb. Azərbaycan Konstitusiyasının tələbinə görə, həmin gün Nazirlər Kabineti istefa verib. Kabinetə baş nazir, onun müavinləri, nazirlər və başqa mərkəzi icra hakimiyyəti orqanlarının rəhbərləri daxildir.
Aprelin 21-də yayılan rəsmi məlumat kabinet istefa verənədək baş nazir postunu tutmuş Artur Rasizadənin yeni hökumətə rəhbərlik etməyəcəyini göstərir. Məlumatda deyilir ki, prezident İlham Əliyev aprelin 21-də Artur Rasizadəyə baş nazir vəzifəsində gördüyü işlərə görə təşəkkürünü bildirib. Artur Rasizadə isə fəaliyyətinə verdiyi yüksək qiymətə görə dövlət başçısına minnətdarlığını bildirib və İlham Əliyevə gələcək fəaliyyətində yeni-yeni uğurlar arzulayıb.
Artur Rasizadə 1935-ci ildə Gəncədə anadan olub. 1957-ci ildə Azərbaycan Sənaye İnstitutunu (indiki Neft və Sənaye Universiteti) bitirib. 1973-cü ilədək Azərbaycan Neft-Maşınqayırma İnstitutunun mühəndisi, şöbə müdiri, elmi işlər üzrə direktor müavini vəzifələrində çalışıb.
1973-1977-ci illərdə İttifaq Neft-Maşınqayırma Birliyi rəisinin birinci müavini, 1977-1978-ci illərdə Azərbaycan Neft-Maşınqayırma İnstitutunun direktoru olub.
1978-1981-ci illərdə Dövlət Plan Komitəsinin sədr müavini, 1981-1986-cı illərdə Azərbaycan KP MK-da maşınqayırma şöbəsinin müdiri vəzifələrində çalışıb.
1986-1992-ci illərdə baş nazirin birinci müavini postunu tutub. 1992-1996-cı illərdə İqtisadi İslahatlar Fondunda məsləhətçi olub.
1996-cı ildə Azərbaycan Respublikası prezidentinin köməkçisi vəzifəsinə təyinat alıb. Həmin il noyabrın 26-dan baş nazir postunu tutub (2003-cü ilin avqustundan noyabrınadək olan dövrü çıxmaq şərti ilə, həmin dövrdə o, baş nazirin birinci müavini işləyib).
