Türkiyə parlamenti: kimin neçə mandatı var?
İyunun 24-ü Türkiyədə prezident və parlament seçkiləri keçirmək nəzərdə tutulur. Bu seçkilərdən sonra ölkənin idarə üsulu dəyişir: baş nazir postu ləğv edilir, prezident hökumət başçısı olub kabineti formalaşdırır, parlamentin səlahiyyətləri qanunvericilik işi ilə məhdudlaşır.
İndi Türkiyə parlament respublikasıdır, hökuməti 550 nəfərlik parlamentdə azı 276 mandatı olan partiya qurur.
Yeni seçiləcək parlament 600 deputatdan ibarət olacaq.
Novator.az bildirir ki, hazırda parlamentin 537 deputatı var. Hakim Ədalət və İnkişaf Partiyası (AKP) 316 mandata sahibdir. Ana müxalifət qurumu olan Cümhuriyyət Xalq Partiyası (CHP) parlamentdə 131, Xalqların Demokratik Partiyası (HDP) 48, Milliyyətçi Hərəkat Partiyası (MHP) 36, İyi Parti (Yaxşı Partiya) 5 mandatla təmsil edilir. 1 deputat partiyasızdır.
Ədalət və İnkişaf Partiyası 2002-ci ildən bəri hakimiyyətdədir. Partiyanın sədri Rəcəb Teyyub Ərdoğan 2003-cü ildən 2014-cü ilədək baş nazir olub. 2014-cü ildən prezidentdir.
