Müqavimət dayanmır
Ermənistanın paytaxtı Yerevanda aprelin 13-dən başlamış etiraz aksiyaları davam edir. Novator.az-ın məlumatına görə, aprelin 20-də aksiyaçılar şəhərin bəzi mərkəzi küçələrini kəsiblər. Polis 30-dan çox fəalı tutub.
Parlamentdə 9 deputatla təmsil olunan müxalif “Çıxış” blokunun lideri, Vətəndaş Sazişi Partiyasının sədri Nikol Paşinyan bütün ölkə ərazisində yolları yük maşınları ilə bağlamağa çağırıb.
Nikol Paşinyanın başçılıq etdiyi davamlı aksiyalarda Serj Sərkisyanın hakimiyyətinin uzanmasına etiraz bildirilir.
42 yaşlı Nikol Paşinyan uzun illər jurnalist fəaliyyəti ilə məşğul olub. 2009-2011-ci illərdə həbsdə yatıb. 2012-ci ildə sabiq prezident Levon Ter-Petrosyanın rəhbərlik etdiyi Erməni Milli Konqresindən, 2017-ci ildə “Çıxış” blokundan deputat seçilib.
Serj Sərkisyan 2008-ci ildən bu il aprelin 9-dək prezident postunu tutub, aprelin 17-si parlamentdə baş nazir seçilib. Həmin gün prezident Armen Sərkisyan Serj Sərkisyanı baş nazir təyin edib. Bununla yeni hökumətin qurulmasına yol açılıb.
Aprelin 9-da tam qüvvəyə minmiş yeni konstitusiyaya görə, baş nazir dövlət idarəçiliyinə ümumi rəhbərliyi həyata keçirən ali vəzifəli şəxsdir.
Prezident Armen Sərkisyan aprelin 19-da hökuməti və aksiyaçıları dialoqa çağırıb. Ölkənin dini lideri II Qaregin isə həm aksiyaçıları, həm də hüquq mühafizə orqanlarının əməkdaşlarını səbirli olmağa, qarşıdurmalara yol verməməyə səsləyib.
