İlin və beşilliyin qazancları
UEFA Çempionlar Liqası və Avropa Liqasının bitməsinə iki raund (yarımfinallar və finallar) qalır. Novator.az bildirir ki, 2017-2018-ci illər mövsümündə UEFA-nın klub turnirlərinə 236 komanda buraxılıb. Yarımfinallarda mübarizəni 6 ölkənin 8 komandası davam etdirir. İspaniya və İngiltərənin 2, İtaliya, Almaniya, Fransa və Avstriyanın 1 təmsilçisi qalır.
Avropa kuboklarında 4 klubla yarışmış Azərbaycan mövsümdə 4,375 əmsal əldə edib. Bu göstərici üzrə Azərbaycan 55 UEFA üzvü arasında 21-ci sıradadır. Son 5 mövsüm üzrə Azərbaycan 19,125 əmsalla 23-cü pillədə qərar tutur. Reytinq UEFA üzvlərinin Çempionlar Liqası və Avropa Liqasında son 5 mövsümdə qazandığı əmsala əsaslanır. Qrup raunduna qədər qələbə 1, heç-heçə yarım xal; qrupda və sonrakı mərhələlərdə qələbə 2, heç-heçə 1 xaldır. Çempionlar Liqasının qrupuna düşmək 4 bonus xalı, 1/8 finala çıxmaq 5 bonus xalı, hər iki turnirin 1/4 finalı, yarımfinalı və finalına yüksəlmək 1 bonus xalı verir. Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır.
Bu mövsüm İngiltərə əmsal sıralamasında birincidir: 19,500. İspaniya ikinci (18,000), İtaliya üçüncü (17,000) pillədə durur.
Son 5 mövsümdə qazanılan ümumi əmsala görə isə İspaniyanın mütləq üstünlüyü var: 105,284. İkinci yerdə dayanan İngiltərə 79,034 əmsal, üçüncü pillədə qərarlaşan İtaliya 75,916 əmsal əldə edib.
