Daha 4 nazir kürsüdə qaldı
Ermənistanda yeni hökumətin daha 4 üzvü təyin edilib. Novator.az-ın məlumatına görə, baş nazir Serj Sərkisyanın təqdimatını əsas götürən prezident Armen Sərkisyan David Arutyunyanı ədliyyə naziri, David Tonoyanı fövqəladə hallar naziri, İqnati Arakelyanı kənd təsərrüfatı naziri, Armen Əmiryanı mədəniyyət naziri vəzifələrində saxlayıb.
Bundan əvvəl Karen Karapetyan baş nazirin birinci müavini, Vaçe Qabrielyan və Armen Gevorkyan baş nazirin müavini postlarına gətiriliblər. Edvard Nalbandyan xarici işlər naziri, Vigen Sərkisyan müdafiə naziri, Vardan Aramyan maliyyə naziri, Suren Karayan iqtisadi inkişaf və investisiya naziri, David Lokyan ərazi idarəçiliyi və inkişafı naziri vəzifələrində qalıblar.
Əvvəlki hökumətdə Karen Karapetyan baş nazir, Vaçe Qabrielyan baş nazirin müavini, beynəlxalq iqtisadi inteqrasiya və islahatlar naziri idi. Armen Gevorkyan isə aprelin 9-dək Prezident Administrasiyasının rəhbəri olub.
Hakim Respublika Partiyasının sədri olan Serj Sərkisyan aprelin 17-si parlamentdə baş nazir seçilib. Həmin gün prezident Armen Sərkisyan Serj Sərkisyanı baş nazir təyin edib. Bununla yeni hökumətin qurulmasına yol açılıb.
Serj Sərkisyan 2008-ci ildən bu il aprelin 9-dək prezident postunu tutub.
