Türkiyə qoşa seçkiyə gedir
Türkiyənin hakim Ədalət və İnkişaf Partiyası ilə müttəfiqi Milliyyətçi Hərəkat Partiyası növbədənkənar seçkilər təşəbbüsü irəli sürüblər. Böyük Millət Məclisinə təqdim olunmuş qanun layihəsində prezident və parlament seçkilərini iyunun 24-də keçirmək istəyi yer alır.
Novator.az bildirir ki, ötən il aprelin 16-da keçirilmiş referendumda Türkiyə Konstitusiyasının 18 maddəsinə dəyişiklik edilib. Əsas yeniliyə əsasən, eyni vaxtda keçiriləcək növbəti prezident və parlament seçkilərindən sonra ölkənin idarə üsulu dəyişir: Nazirlər Kabineti, baş nazir postu ləğv edilir, prezident hökumət başçısı olub kabineti parlamentin hər hansı müdaxiləsi olmadan formalaşdırır. Hazırda parlament seçkisinin nəticəsinə əsasən formalaşan hökumət bu qurum qarşısında hesabatlıdır.
Növbəti prezident və parlament seçkisi 2019-cu il noyabrın 3-də olmalı idi. Aprelin 18-i Ədalət və İnkişaf Partiyasının sədri, prezident Rəcəb Teyyub Ərdoğanla Milliyyətçi Hərəkat Partiyasının lideri Dövlət Baxçalının görüşündə seçkiləri bu il iyunun 24-nə çəkmək razılaşdırılıb. Qoşa seçkiyə Ədalət və İnkişaf Partiyası ilə Milliyyətçi Hərəkat Partiyası bir koalisiyada qatılacaq.
Türkiyə parlamentində bu iki partiya ilə yanaşı Cümhuriyyət Xalq Partiyası, Xalqların Demokratik Partiyası da təmsil olunur.
Ədalət və İnkişaf Partiyası 2002-ci ildən bəri təkbaşına hakimiyyətdədir. Partiyanın lideri Rəcəb Teyyub Ərdoğan 2003-cü ildən 2014-cü ilədək baş nazir olub. 28 avqust 2014-cü ildən prezidentdir.
