Təzyiqin oynayırsa, su iç
Arterial təzyiqi normada saxlamaqla ürək-damar sistemi xəstəliklərindən uzaq olmaq mümkündür. Novator.az-ın məlumatına görə, London İmperial Kollecinin alimləri orqanizmdə vəziyyətin dəyişməsi ilə təzyiqi qalxıb-düşən insanlarda arterial təzyiqi stabilləşdirməyin üsulunu tapıblar.
Alimlər bildirirlər ki, arterial təzyiq həddi orqanizmin sinir sistemi ilə tənzimlənir. Bəzi insanlarda sinir sisteminin fəaliyyətində problemlər yaranır. Onlar ayağa qalxanda təzyiqləri kəskin düşür, çünki sinir sistemi ona nəzarət edə bilmir. Mütəxəssislər belə problemi olan adamlara hər dəfə təzyiqi düşəndən sonra 480 milli litr (yarım litrə yaxın) su içməyi məsləhət görür. Alimlərin tədqiqatı bu üsulun effektli olduğunu göstərib.
Bundan əvvəl Uestmid Tibbi Tədqiqat İnstitutunun alimləri suyun böyrək polikistozu xəstəliyi olanlara kömək etdiyini üzə çıxarıb. Belə anadangəlmə xəstəliyin hazırda müalicəsinin olmadığı bildirilir. Çünki sağlam toxumaları məhv edən kistaların meydana gəlməsi səbəbindən böyrəklər tədricən sıradan çıxır.
Tədqiqatçılar hesab edir ki, adi su böyrəklərdə kistanın yaranmasını zəiflədə bilər. Çünki su kistanın böyüməsinə kömək edən hormonun fəaliyyətini ləngidir. Ona görə də alimlər bol su içməyi tövsiyə edir.
Hazırda alimlərin tədqiqatına 240 könüllü cəlb edilib. Son nəticələr 2020-cı ildə bəlli olacaq.
Səidə Hüseynova
