Müxalifət təklif etdi, hökumət buraxıldı
Qırğızıstan prezidenti Sooronbay Jeenbekov aprelin 19-da hökuməti istefaya göndərib. Novator.az-ın məlumatına görə, istefaya parlamentin hökumətə etimadsızlıq göstərməsi səbəb olub.
Aprelin 19-da hökumətin 2017-ci ilə dair hesabatı müzakirə olunarkən parlament müxalif azlığın təklifi ilə Nazirlər Kabinetinə etimadsızlıq ifadə edib.
Ötən ilin 8 ayında hökumətin başında Sooronbay Jeenbekov dayanıb. Hazırda Sapar İsakovun baş nazirlik etdiyi hökumət ötən ilin sentyabrında fəaliyyətə başlayıb. Sapar İsakov hökumətinə etimadsızlıq təklifini 101 deputat dəstəkləyib, 5 nəfər bunun əleyhinə olub.
Qırğızıstanda hökumət etimadsızlığa görə ilk dəfədir buraxılır.
Ölkədə ali icraedici orqan hökumətdir. Hökuməti 120 yerlik parlamentdə deputatların yarıdan çoxunu təşkil edən fraksiya və ya koalisiya qurur. Dövlət başçısı olan prezident isə ümumxalq seçkisində 6 il müddətinə seçilir.
Sooronbay Jeenbekov ötən il oktyabrın 15-də dövlət başçısı seçilib, noyabrın 24-də and içərək səlahiyyətlərinin icrasına başlayıb.
O, 2016-ci ilin aprel ayından 2017-ci il mayın 17-dək baş nazir olub.
Səidə Hüseynova
