Hökumət qurulur, aksiyalar isə səngimir
Ermənistan prezidenti Armen Sərkisyan baş nazir Serj Sərkisyanın təqdimatlarına baxaraq yeni hökumətin ilk üzvlərini təyin edib. Novator.az-ın məlumatına görə, Karen Karapetyan baş nazirin birinci müavini, Vaçe Qabrielyan və Armen Gevorkyan baş nazirin müavini postlarına gətiriliblər. Edvard Nalbandyan xarici işlər naziri, Vigen Sərkisyan müdafiə naziri vəzifələrində qalıblar. Sərəncamlar aprelin 18-də imzalanıb.
Əvvəlki hökumətdə Karen Karapetyan baş nazir, Vaçe Qabrielyan baş nazirin müavini, beynəlxalq iqtisadi inteqrasiya və islahatlar naziri idi. Armen Gevorkyan isə aprelin 9-dək Prezident Administrasiyasının rəhbəri olub.
Hakim Respublika Partiyasının sədri olan Serj Sərkisyan aprelin 17-si parlamentdə baş nazir seçilib. O, 105 deputatı olan Milli Məclisdə 77 nəfərdən dəstək alıb. Həmin gün prezident Armen Sərkisyan Serj Sərkisyanı baş nazir təyin edib. Bununla yeni hökumətin qurulmasına yol açılıb.
Aprelin 9-da tam qüvvəyə minmiş yeni konstitusiyaya görə, Nazirlər Kabineti icra hakimiyyətinin ali orqanı, baş nazir dövlət idarəçiliyinə ümumi rəhbərliyi həyata keçirən ali vəzifəli şəxsdir.
Serj Sərkisyan 2008-ci ildən bu il aprelin 9-dək prezident postunu tutub. Onun hakimiyyətinin uzanmasını istəməyən müxaliflər parlamentdə 9 deputatla təmsil olunan “Çıxış” blokunun təşəbbüsü ilə aprelin 13-dən paytaxt Yerevanda aksiyalar keçirir. Aksiyalara Vətəndaş Sazişi Partiyasının sədri, “Çıxış” blokunun lideri Nikol Paşinyan başçılıq edir. Aprelin 19-da aksiyaçılar baş nazirin iqamətgahı qarşısına toplaşıblar.
