Neft Fondunun gəlir-çıxarı
Dövlət Neft Fondu bildirir ki, 2018-ci ilin yanvar-mart aylarında büdcə gəlirləri 4 milyard 424,2 milyon manat, xərclər 2 milyard 344,2 milyon manat olub.
Neft və qaz sazişlərinin həyata keçirilməsindən 4 milyard 303,3 milyon manat, fondun vəsaitinin idarə olunmasından 120,9 milyon manat əldə edilib.
Valyuta məzənnələrinin dəyişməsindən yaranan fərqlə bağlı büdcədənkənar gəlir 779,9 milyon manat göstərilir.
Hesabat dövrü ərzində 2018-ci ilin dövlət büdcəsinə 2 milyard 299 milyon manat transfert edilib.
Qaçqın və məcburi köçkün ailələrinin məskunlaşdırılması və sosial-məişət vəziyyətinin yaxşılaşdırılması üzrə tədbirlərə 30,3 milyon manat, Samur-Abşeron suvarma sisteminin yenidən qurulmasına 8,1 milyon manat, Bakı-Tbilisi-Qars yeni dəmir yolu layihəsinin maliyyələşdirilməsinə 1,4 milyon manat vəsait ayrılıb.
500 min manat vəsait Azərbaycan gənclərinin xarici ölkələrdə təhsili üzrə dövlət proqramının maliyyələşdirilməsinə yönəldilib.
Fondun idarə edilməsi ilə bağlı xərclər 4,9 milyon manat olub.
2018-ci il aprelin 1-nə fondun aktivləri 37 milyard 631,7 milyon ABŞ dollarına çatıb.
