Üç ayda 1333 nəfər ölkədən çıxarılıb
Dövlət Miqrasiya Xidməti 2018-ci ilin birinci rübünün hesabatını verib. Rəsmi məlumatda qeyd olunur ki, yanvar-mart aylarında Dövlət Miqrasiya Xidməti qanunvericiliyin tələblərinin pozulmasına görə 4665 qərar qəbul edib. Bunun 2856-sı inzibati cərimə tətbiqi, 1333-ü ölkədən inzibati qaydada çıxarılma, 320-si ölkəyə girişə məhdudiyyətin qoyulmasıdır.
2018-ci ilin ilk rübü ərzində Dövlət Miqrasiya Xidmətinə əcnəbilər və vətəndaşlığı olmayan şəxslərdən ölkədə müvəqqəti olma müddətlərinin uzadılması, müvəqqəti və daimi yaşamaq üçün icazələrin alınması, vətəndaşlığa qəbul, bərpa, vətəndaşlıqdan çıxma, eləcə də vətəndaşlıq mənsubiyyətinin və qaçqın statusunun müəyyənləşdirilməsi, həmçinin əmək fəaliyyətinin həyata keçirilməsi üçün iş icazələrinin alınması və mövcud iş icazələrinin müddətlərinin uzadılması ilə bağlı 19 mindən çox müraciət daxil olub.
