Birinci rübün göstəriciləri
Bu ilin yanvar-mart aylarında kənd təsərrüfatının ümumi məhsulu 2017-ci ilin birinci rübü ilə müqayisədə 4,2 faiz, o cümlədən bitkiçilik məhsulları istehsalı 63,2 faiz, heyvandarlıq məhsulları istehsalı 2,8 faiz artıb. Novator.az-ın məlumatına görə, Dövlət Statistika Komitəsi belə hesabat yayıb.
Makroiqtisadi göstəricilərə dair rəsmi açıqlamada qeyd olunur ki, 2017-ci ilin birinci rübü ilə müqayisədə yük daşınmasında 0,7 faiz, sərnişin daşınmasında 1,5 faiz artım olub.
İnformasiya və rabitə xidmətlərinin həcminin dəyər ifadəsində 13,2 faiz artdığı bildirilir.
2017-ci ilin müvafiq dövrü ilə müqayisədə 2018-ci ilin yanvar-mart aylarında əhalinin gəlirləri nominal ifadədə 9,8 faiz artaraq 12 milyard 533,3 milyon manata çatıb.
Mərkəzi Bankın hesabatına görə, martın 1-nə ölkənin bank və digər kredit təşkilatlarının kredit portfeli milli valyuta ekvivalentində 11 milyard 561,1 milyon manat təşkil edib. Ödəmə vaxtı keçmiş kreditlərin məbləği ümumi kredit portfelinin 14,7 faizinə bərabər olub.
Əhalinin banklardakı əmanətlərinin milli valyuta ekvivalentində məbləği martın 1-nə 7 milyard 750,3 milyon manat göstərilir.
