Qələbə protokolu dərc olundu
Mərkəzi Seçki Komissiyasının 15 aprel qərarı və İlham Əliyevin yenidən prezident seçilməsini əks etdirən protokol dərc olunub.
Novator.az bildirir ki, MSK-nın qərarına əsasən, 57 saylı Kürdəmir seçki dairəsinin 2 saylı, 69 saylı Cəlilabad-Masallı-Biləsuvar seçki dairəsinin 26 saylı, 73 saylı Lənkəran şəhər seçki dairəsinin 10 saylı və 74 saylı Lənkəran kənd seçki dairəsinin 12 saylı seçki məntəqələri üzrə pozuntular aşkar edildiyindən səsvermənin nəticələri etibarsız sayılıb.
57 saylı Kürdəmir seçki dairəsinin 2 saylı və 73 saylı Lənkəran şəhər seçki dairəsinin 10 saylı məntəqə seçki komissiyaları tam tərkibdə buraxılıb.
Mərkəzi Seçki Komissiyasının protokolu təsdiq edilməklə seçkiyə yekun vurulub, protokol Konstitusiya Məhkəməsinə göndərilib. Konstitusiya Məhkəməsi 11 aprel seçkisinin nəticələrinə aprelin 17-də baxacaq.
Mərkəzi Seçki Komissiyasının elan etdiyi nəticələrə görə, prezident seçkisində dövlət başçısı İlham Əliyev 86,02 faiz səslə qalib gəlib. Zahid Oruc 3,12 faiz, Sərdar Cəlaloğlu 3,03 faiz, Qüdrət Həsənquliyev 3,02 faiz, Hafiz Hacıyev 1,52 faiz, Araz Əlizadə 1,38 faiz, Fərəc Quliyev 1,17 faiz, Razi Nurullayev 0,74 faiz səs yığıb.
Konstitusiya Məhkəməsi nəticələri təsdiqləyəndən uzağı 3 gün sonra yeni seçilmiş prezident and içərək səlahiyyətlərinin icrasına başlamalıdır.
İlham Əliyev 2003-cü ildən prezidentdir. 2016-cı ildə konstitusiyaya edilmiş dəyişikliklə prezidentlik müddəti 5 ildən 7 ilə qaldırılıb.
