Konstitusiya Məhkəməsi vaxt təyin etdi
Konstitusiya Məhkəməsi 11 aprel prezident seçkisinin nəticələrinə aprelin 17-də baxacaq.
Aprelin 15-də Mərkəzi Seçki Komissiyası prezident seçkisinə yekun vurub və nəticələrə dair protokolu müvafiq sənədlərlə birlikdə Konstitusiya Məhkəməsinə təqdim edib. Nəticələrə görə, prezident seçkisində dövlət başçısı İlham Əliyev 86,02 faiz səslə qalib gəlib. Zahid Oruc 3,12 faiz, Sərdar Cəlaloğlu 3,03 faiz, Qüdrət Həsənquliyev 3,02 faiz, Hafiz Hacıyev 1,52 faiz, Araz Əlizadə 1,38 faiz, Fərəc Quliyev 1,17 faiz, Razi Nurullayev 0,74 faiz səs yığıb.
16 apreldə açıqlanan rəsmi bilgiyə əsasən, Mərkəzi Seçki Komissiyasının protokolunun təsdiqinə və seçkinin nəticələrinə Konstitusiya Məhkəməsi Plenumunun iclasında baxılacaq. İclas aprelin 17-si saat 15-ə təyin edilib.
Konstitusiya Məhkəməsi nəticələri təsdiqləyəndən uzağı 3 gün sonra yeni seçilmiş prezident and içərək səlahiyyətlərinin icrasına başlamalıdır.
İlham Əliyev 2003-cü ildən prezidentdir. 2016-cı ildə konstitusiyaya edilmiş dəyişikliklə prezidentlik müddəti 5 ildən 7 ilə qaldırılıb.
