Erkən qaliblər
Avropanın daha iki nəhəng futbol ölkəsində milli çempionatın qalibi bəlli olub. Novator.az-ın məlumatına görə, “Mançester Siti” İngiltərə çempionatının finişinə 5 tur qalmış 87 xalla zirvə yarışını öndə bitirib. 5-ci dəfə çempionluq titulu əldə edən klub ən yaxın izləyicisi “Mançester Yunayted”i 16 xal qabaqlayır.
Fransada da çempionluq yarışı sona 5 tur qalmış yekunlaşıb. 33 oyuna 87 xal toplayan PSJ qızıl medallara sahib çıxıb. Bu, Paris klubunun 7-ci çempionluğudur. İkinci pillədə gedən “Monako”nun 70 xalı var.
Münhenin “Bavariya” klubu daha əvvəl Almaniyada qızıl medalları təmin etmişdi.
İspaniya çempionatına başçılıq edən “Barselona” 32 turda 82 xal yığıb. “Atletiko”nun 71, “Real”ın 67 xalı var.
İtaliya çempionatında “Yuventus” 32 oyuna 84 xalla öndədir. “Napoli” 78 xalla ikincidir.
Ötən həftəsonu PSV Hollandiyada erkən çempionluq qazanıb. Portuqaliya çempionatında “Portu”, Türkiyə çempionatında “Qalatasaray”, Ukrayna çempionatında “Şaxtyor”, Rusiya çempionatında “Lokomotiv” (Moskva) liderlik edir.
