Avropadan demokratiya mesajları
Avropa Şurasının baş katibi Torbyorn Yaqland İlham Əliyevi yenidən prezident seçilməyi münasibətilə təbrik edib. Təbrik məktubunda Azərbaycanda Avropa İnsan Hüquqları Konvensiyasına əsaslanan insan hüquqları, demokratiya və qanunun aliliyi standartlarının üstünlüyünün təmin olunması istiqamətində işbirliyi niyyəti yer alır.
Avropa İttifaqı Şurasının prezidenti Donald Tusk da İlham Əliyevə təbrik məktubu göndərib. Məktubda deyilir: “Ümidvaram ki, yeni prezidentliyiniz müddətində ortaq fundamental dəyərlərə və prinsiplərə, eləcə də qlobal siyasi və iqtisadi maraqlarımıza əsaslanan yeni geniş ikitərəfli saziş üzrə aparılan danışıqlar vasitəsilə Azərbaycan-Avropa İttifaqı münasibətləri daha da dərinləşəcək.
Mən regionda sabitlik və rifah kimi ümumi məqsədlərimizə nail olmaq, Avropa İttifaqının iştirakını və dəstəyini daha da gücləndirmək məqsədilə Şərq tərəfdaşlığı çərçivəsində əməkdaşlığımızı inkişaf etdirmək naminə Sizinlə fəaliyyətimizin davam etməsini səmimiyyətlə arzulayıram”.
Aprelin 15-də Mərkəzi Seçki Komissiyası 11 aprel prezident seçkisinə yekun vurub və nəticələrə dair protokol müvafiq sənədlərlə birlikdə Konstitusiya Məhkəməsinə göndərilib.
Rəsmi məlumata görə, 8 namizədin yer aldığı prezident seçkisində dövlət başçısı İlham Əliyev 86,02 faiz səslə qalib gəlib.
Seçki Məcəlləsinə görə, Konstitusiya Məhkəməsi nəticələri təsdiqləyəndən uzağı 3 gün sonra yeni seçilmiş prezident and içərək səlahiyyətlərinin icrasına başlamalıdır.
İlham Əliyev 2003-cü ildən prezidentdir.
2016-cı ildə konstitusiyaya edilmiş dəyişikliklə prezidentlik müddəti 5 ildən 7 ilə qaldırılıb.
