MSK İlham Əliyevin qələbəsini rəsmiləşdirdi
Aprelin 15-də Mərkəzi Seçki Komissiyasının iclası keçirilib. İclasda 11 aprel prezident seçkisinə yekun vurulub və nəticələrə dair protokolun müvafiq sənədlərlə birlikdə Konstitusiya Məhkəməsinə təqdim edilməsi qərara alınıb.
Rəsmi məlumata görə, prezident seçkisində dövlət başçısı İlham Əliyev 86,02 faiz səslə qalib gəlib.
Zahid Oruc 3,12 faiz, Sərdar Cəlaloğlu 3,03 faiz, Qüdrət Həsənquliyev 3,02 faiz, Hafiz Hacıyev 1,52 faiz, Araz Əlizadə 1,38 faiz, Fərəc Quliyev 1,17 faiz, Razi Nurullayev 0,74 faiz səs yığıb.
Namizəd səsvermədə iştirak etmiş seçicilərin yarısından çoxunun səsi ilə prezident seçilmiş sayılır. Seçki Məcəlləsinə görə, Konstitusiya Məhkəməsi nəticələri təsdiqləyəndən uzağı 3 gün sonra yeni seçilmiş prezident and içərək səlahiyyətlərinin icrasına başlamalıdır.
İlham Əliyev 2003-cü ildən prezidentdir. 1993-2003-cü illər arasında isə prezident postunu onun atası Heydər Əliyev tutub.
2016-cı ildə konstitusiyaya edilmiş dəyişikliklə prezidentlik müddəti 5 ildən 7 ilə qaldırılıb.
