Sənaye və sərmayə göstəriciləri açıqlanıb
2018-ci ilin yanvar-mart aylarında 11,1 milyard manatlıq və ya əvvəlki ilin müvafiq dövrü ilə müqayisədə 2 faiz çox sənaye məhsulu istehsal edilib. Məhsul istehsalı sənayenin qeyri-neft sektorunda 9,9 faiz, neft sektorunda 0,9 faiz artıb. Novator.az-ın məlumatına görə, Dövlət Statistika Komitəsi belə hesabat yayıb.
Rəsmi açıqlamaya əsasən, sənaye məhsulunun 73,5 faizi mədən sektorunda, 21,3 faizi emal sektorunda, 4,6 faizi elektrik enerjisi, qaz və buxar istehsalı, bölüşdürülməsi və təchizatı sektorunda, 0,6 faizi su təchizatı, tullantıların təmizlənməsi və emalı sektorunda istehsal olunub.
Başqa bir hesabatda bildirilir ki, yanvar-mart aylarında ölkənin iqtisadi və sosial sahələrinin inkişafı üçün əsas kapitala yönəldilmiş 2 milyard 869,2 milyon manat vəsaitin 50,8 faizi qeyri-neft sektoruna sərf edilib və bu sektorda investisiyaların həcmi ötən ilin eyni dövrü ilə müqayisədə 41,2 faiz artıb. Daxili mənbələrdən əsas kapitala yönəldilmiş vəsait ümumi sərmayənin 51,7 faizini təşkil edib.
