Orta əməkhaqqı nə qədərdir?
Dövlət Statistika Komitəsi iqtisadiyyatda işləyənlərin sayı və əməkhaqqı barədə rəsmi hesabat yayıb. Novator.az bildirir ki, rəsmi açıqlamaya görə, 2018-ci il martın 1-nə ölkə iqtisadiyyatında muzdla çalışan işçilərin sayı 1 milyon 516,5 min nəfər olub, onların 887,9 min nəfəri dövlət sektorunda, 628,6 min nəfəri qeyri-dövlət sektorunda fəaliyyət göstərib.
Hesabata əsasən, yanvar-fevral aylarında ölkə iqtisadiyyatında muzdla çalışan işçilərin orta aylıq nominal əməkhaqqı əvvəlki ilin müvafiq dövrünə nisbətən 2,2 faiz artaraq 510,8 manat olub.
Əvvəlki hesabatında Dövlət Statistika Komitəsi yanvar ayında orta aylıq nominal əməkhaqqının əvvəlki ilin müvafiq dövrünə nisbətən 3 faiz artaraq 519,8 manata çatdığını bəyan etmişdi.
Azərbaycan qanunvericiliyi pensiya kapitalının ildə bir dəfə ölkə üzrə orta aylıq nominal əməkhaqqının artım tempinə uyğun olaraq indeksləşdirilməsini nəzərdə tutur. Dövlət Statistika Komitəsi ötən il ölkə iqtisadiyyatında muzdla çalışan işçilərin orta aylıq nominal əməkhaqqının 5,7 faiz artdığını açıqlayıb. Bu il yanvarın 1-dən pensiyalar bu artım tempinə uyğun olaraq artırılıb. 5,7 faizlik artım pensiyaçıların 94 faizinə şamil olunub.
Sevinc Kərimli
