Məhkəmə sabiq nazirə bircə güzəşt elədi
Moskva Şəhər Məhkəməsi Rusiyanın sabiq iqtisadi inkişaf naziri Aleksey Ulyukayevin şikayətini qismən təmin edib.
Aleksey Ulyukayev 2017-ci il dekabrın 15-də paytaxtın Zamoskvoretski Rayon Məhkəməsinin hökmü ilə 8 il müddətinə azadlıqdan məhrum edilib və həbs olunub. Ona 130 milyon rubl cərimə də kəsilib.
Sabiq nazir 2 milyon dollar rüşvət almaqda təqsirli bilinib. Aleksey Ulyukayevin “Başneft” şirkətinin aksiyalarının alınmasına razılıq vermək üçün “Rosneft” şirkətindən 2 milyon dollar alarkən tutulduğu açıqlanıb.
Moskva Şəhər Məhkəməsinə üz tutan vəkillər sabiq nazirə kəsilən həbs hökmünü ləğv etməyi və ya onu şərti cəza ilə əvəzləməyi istəmişdi.
Novator.az-ın məlumatına görə, Moskva Şəhər Məhkəməsi aprelin 12-də Zamoskvoretski Rayon Məhkəməsinin ötən il çıxardığı hökmü qüvvədə saxlayıb. Məhkəmə yalnız sabiq nazirin üzərindən həbsdən çıxdıqdan sonra 8 il dövlət vəzifələrində çalışmağa qoyulan qadağanı götürüb.
Vəkillər apellyasiya instansiyasının qərarından kassasiya şikayəti verəcəklərini bildiriblər.
Aleksey Ulyukayev iqtisadi inkişaf naziri postunu 2013-cü ildən tutub. 2016-cı il noyabrın 15-də Rusiyanın İstintaq Komitəsi cinayət işi qaldıran kimi o, nazir postundan azad edilib.
Səidə Hüseynova
