18 il, 11 seçki, 3 referendum
18 ildir Mərkəzi Seçki Komissiyasına Məzahir Pənahov sədrlik edir. 1951-ci il təvəllüdlü Məzahir Pənahov fizika-riyaziyyat elmləri doktoru, professordur. 2000-ci ildə Milli Məclisin qərarı ilə MSK üzvü təyin edilib və sədr seçilib.
Qanunvericiliyə görə, 18 nəfərlik MSK-da yerlərin üçdə bir hissəsini parlamentdəki çoxluq partiyasının, üçdə bir hissəsini bitərəflərin, üçdə bir hissəsini azlıqda qalan partiyaların təqdim etdiyi nümayəndələr tutur.
Məzahir Pənahov hakim Yeni Azərbaycan Partiyasının təqdim etdiyi nümayəndədir. O, sonuncu dəfə 2016-cı ilin aprelində MSK sədri seçilib.
Novator.az bildirir ki, 18 ildə Məzahir Pənahovun MSK-ya sədrliyi ilə 11 seçki, 3 referendum keçirilib.
2000-ci il noyabrın 5-də, 2005-ci il noyabrın 6-da, 2010-cu il noyabrın 7-də, 2015-ci il noyabrın 1-də parlament seçkiləri olub.
Onun dövründəki prezident seçkiləri 2003-cü il oktyabrın 15-nə, 2008-ci il oktyabrın 15-nə, 2013-cü il oktyabrın 9-na və 2018-ci il aprelin 11-nə düşüb.
Məzahir Pənahovla bələdiyyə seçkiləri bu tarixlərdə olub: 17 dekabr 2004-cü il, 23 dekabr 2009-cu il, 23 dekabr 2014-cü il.
2002-ci ilin 24 avqust, 2009-cu ilin 18 mart və 2016-cı ilin 26 sentyabr referendumları da Məzahir Pənahovun MSK-ya rəhbərliyi ilə baş tutub.
2011-ci ildə Məzahir Pənahov Azərbaycan Respublikasının ictimai-siyasi həyatında fəal iştirakına görə “Şöhrət” ordeni ilə təltif edilib.
Nailə Abdullayeva
