Ukrayna MDB-dən rəsmən çıxmaq istəyir
Ukrayna prezidenti Pyotr Poroşenko Nazirlər Kabinetinə ölkənin Müstəqil Dövlətlər Birliyindən rəsmən çıxması proseduruna başlamaq göstərişi verib.
Novator.az-ın məlumatına görə, aprelin 12-si paytaxt Kiyevdə keçirilən təhlükəsizlik forumunda çıxış edən Pyotr Poroşenko ölkə parlamentinə Rusiya ilə dostluq müqaviləsinin bəzi müddəalarının ləğvini nəzərdə tutan qanun layihəsi göndərəcəyini də deyib.
1991-ci ildə SSRİ-nin süqutundan sonra yaradılmış MDB-yə Azərbaycan, Moldova, Belarus, Ukrayna, Rusiya, Ermənistan, Qazaxıstan, Qırğızıstan, Tacikistan, Özbəkistan, Türkmənistan üzvdür. Gürcüstan bu birlikdən 2008-ci ildə ayrılıb. Qurumun icra orqanı Minskdə yerləşir.
2014-cü ildə Rusiya Ukrayna torpaqlarını işğal edəndən sonra rəsmi Kiyev MDB-nin tədbirlərini ya boykot edir, ya da toplantılarda aşağı ranqlı məmurlarla təmsil olunur.
Novator.az-ın arayışı:
MDB-nin əsası Rusiya, Belarus və Ukrayna dövlət başçılarının 8 dekabr 1991-ci ildə Belarusda imzaladığı sazişlə qoyulub.
21 dekabr 1991-ci ildə Almatıda keçmiş SSRİ-nin daha 8 respublikası – Moldova, Azərbaycan, Ermənistan, Qazaxıstan, Özbəkistan, Türkmənistan, Qırğızıstan, Tacikistan sazişi imzalayaraq MDB-yə qoşulublar.
Azərbaycanın MDB-yə qoşulması 20 sentyabr 1993-cü ildə rəsmiləşib. 1993-cü il dekabrın 9-da Gürcüstan da MDB-yə qoşulub.
22 yanvar 1993-cü ildə Minskdə MDB-nin nizamnaməsi qəbul olunub. Ukrayna və Türkmənistan indiyəcən nizamnaməni imzalamayıb. Həmin vaxtdan bu iki dövlət MDB-nin üzvləri yox, təsisçiləri və iştirakçıları sayılır.
18 avqust 2008-ci ildə Gürcüstan MDB-dən çıxmaq barədə nota verib. Təşkilatın nizamnaməsinə uyğun olaraq bir il sonra – 18 avqust 2009-cu ildə Gürcüstanın MDB-dən ayrılması rəsmiləşib.
2014-cü ildə Ukrayna MDB-dən çıxmaq niyyətində olduğunu bəyan edib.
