Ermənistan prezidenti maaşdan imtina edir
Ermənistanın yeni prezidenti Armen Sərkisyan maaşını xeyriyyə işlərinə sərf edəcək. Novator.az-ın məlumatına görə, prezidentin müşaviri Asmik Petrosyan aprelin 12-də belə açıqlama verib. O, Armen Sərkisyanın 7 illik prezidentlik dövründə öz evində yaşayacağını da bəyan edib.
Müşavir prezidentin maaşının hansı təşkilatlara köçürüləcəyinin hələ dəqiqləşmədiyini vurğulayıb.
Ermənistan prezidentinin aylıq əməkhaqqı 1 milyon 320 min dramdır (2 min 700 ABŞ dolları).
Armen Sərkisyanın səfir işlədiyi illərdə də maaşından imtina etdiyi qeyd olunur.
Martın 2-də parlamentin prezident seçdiyi Armen Sərkisyan aprelin 9-da səlahiyyətlərinin icrasına başlayıb.
64 yaşlı Armen Sərkisyan fizika-riyaziyyat elmləri namizədidir. Uzun illər Yerevan Dövlət Universitetində müəllim işləyib. 1984-1985-ci illərdə Böyük Britaniyanın Kembric Universitetində çalışıb.
1992-1995-ci, 1998-2000-ci və 2013-2018-ci illərdə Ermənistanın Böyük Britaniyada səfiri olub, müxtəlif illərdə Ermənistanı Avropa İttifaqında, Belçika, Niderland, Lüksemburq və Vatikanda səfir kimi təmsil edib.
1996-cı ilin noyabrından 1997-ci ilin fevralınadək Ermənistanın baş naziri olub.
Armen Sərkisyan müxtəlif ölkələrdə enerji, neft və qaz hasilatı sahəsində fəaliyyət göstərən şirkətin sahibi olduğu bildirilir.
