ATƏT missiyası rəyini açıqladı
11 aprel prezident seçkisini müşahidə etmiş ATƏT və AŞPA missiyalarının nümayəndələri aprelin 12-si Bakıda mətbuat konfransı keçiriblər.
Azadliq.org-un məlumatına görə, mətbuat konfransına ATƏT-in Demokratik Təsisatlar və İnsan Haqları Bürosunun təmsilçisi Korin Yonker, ATƏT Parlament Assambleyasından Nilza de Sena, Avropa Şurası Parlament Assambleyasının müşahidə missiyasının rəhbəri Viorel Rikard Badea qatılıb.
ATƏT missiyasının rəyini səsləndirən Nilza de Sena qeyd edib ki, prezident seçkisi məhdudlaşdırıcı siyasi mühitdə keçirilib: “Plüralizm olmadığı şəraitdə həqiqi rəqabət də olmayıb. Digər namizədlər prezidenti tənqid etməkdən çəkiniblər”.
Nilza de Sena əlavə edib ki, seçki günü bəzi müşahidəçilərdən şəffaflığın olmaması, pozuntulara yol verilməsi barədə məlumatlar alıblar: “Müşahidəçilərimiz topa bülleten atılmasının şahidi olublar. 11 aprel seçkisi 2016-cı ildə konstitusiyaya edilən düzəlişlərdən sonra Azərbaycanda keçirilmiş ilk prezident seçkisidir. Bir sıra inzibati və hüquqi qadağalar qeydə alınıb. Seçki administrasiyası yaxşı təşkil olunsa da, bütün prosedurları əhatə etməyib”.
Missiyanın rəyində bildirilir ki, MSK 5,2 milyon seçicini qeydiyyata alıb, amma rəqəmlərin dəqiqliyi ilə bağlı iki dövlət qurumunun məlumatında ziddiyyət olub: “Tələbələr, büdcə təşkilatlarının işçiləri YAP-ın təşviqatına cəlb olunub. Ölkədə mətbuat mühiti, ifadə və söz azadlığı məhdudlaşdırılıb.
Televiziyaların hamısında xəbər buraxılışlarının əksəriyyəti hökumətin fəaliyyətinə həsr edilib. Hökumətin tənqidi ilə bağlı fikirlərə rast gəlinməyib. Əsas efir vaxtı prezidentə həsr olunub.
Müşahidəçilərə problem yaradılmayıb. Ancaq seçki günü məntəqə seçki komissiyalarında məcburi prosedurlara əməl olunmayıb, məntəqələrin 12 faizində səslərin sayılması zamanı pozuntulara yol verilib, qəsdən saxtalaşdırma halları müşahidə olunub”.
