Avro yuxarı dartınıb
Aprelin 10-da avronun rəsmi məzənnəsi 2,0938 manata yüksəlib.
Mərkəzi Bank ABŞ dollarının kursunu 1,7 manat səviyyəsində saxlayıb.
Bir neçə valyuta isə ucuzlaşıb. Novator.az-ın məlumatına görə, dəyər itirən gürcü larisi banklara 0,7069, Rusiya rublu 0,0281, türk lirəsi 0,4177 manata satılır (Məzənnələr).
2018-ci ildə ABŞ dollarının maksimal rəsmi qiyməti 1,7001 manat olub. Həmin kurs ilin əvvəlindən martın 7-dək qüvvədə qalıb.
Mərkəzi Bank aprelin 9-da kommersiya banklarına verilən borclar üzrə faiz dərəcəsini – uçot dərəcəsini 13%-dən 11%-ə endirib. Rəsmi açıqlamada qeyd olunub ki, qərar makroiqtisadi sabitliyin möhkəmlənməsi prosesləri və son makroiqtisadi proqnozlar nəzərə alınmaqla qəbul edilib: “İnflyasiya birrəqəmli səviyyədədir, xarici sektor göstəriciləri pozitiv zonadadır, valyuta bazarında sabitlik davam edir və iqtisadi aktivlik güclənməkdədir. Manatın məzənnəsinin sabit qalması inflyasiya səviyyəsinə və inflyasiya gözləntilərinə azaldıcı təsir göstərən mühüm amillərdən biri olub. Məzənnənin sabitliyi başlıca olaraq əhalinin əmanətləri üzrə dollarlaşmanın azalması proseslərinin sürətlənməsi ilə müşayiət olunub”.
