Müdafiə naziri orduya tapşırıq verib
Müdafiə naziri general-polkovnik Zakir Həsənov aprelin 7-də rəhbər heyətin iştirakı ilə xidməti müşavirə keçirib. Mod.gov.az-ın məlumatına görə, nazir prezident İlham Əliyevin son çıxışlarında səsləndirdiyi fikirləri və Azərbaycan Ordusu qarşısında qoyduğu tapşırıqları şəxsi heyətə çatdırıb. Ali baş komandanın orduya yüksək qiymət verdiyini, diqqət və qayğı ilə yanaşdığını vurğulayan müdafiə naziri cəbhə bölgəsindəki vəziyyəti təhlil edib, qarşıda duran vəzifələrdən danışıb.
Səfərbərlik və hərbi xidmətə çağırışın Müdafiə Nazirliyinin tabeliyində olan hərbi hissələrdə uğurla davam etdirildiyini bildirən nazir gənc əsgərlərin qəbulu və yerləşdirilməsi ilə bağlı göstərişlər verib.
Müdafiə naziri 11 aprel prezident seçkisinin hərbi hissələrdə də yüksək səviyyədə təşkili və keçirilməsi ilə bağlı konkret tapşırıqlar qoyub. O, cəbhə xəttində ehtimal olunan istənilən təxribatlara daim hazır olmağı, belə hallar baş verərsə dərhal qarşısının alınması məqsədilə qətiyyətli tədbirlərin görülməsini tapşırıb.
1988-ci ilin fevralında Azərbaycanın Əsgəran, Hadrut, Mardakert, Martuni, Şuşa rayonları və Stepanakert şəhərindən ibarət Dağlıq Qarabağ Muxtar Vilayətinin Ermənistana verilməsi tələbi ilə separatçı hərəkat, hərbi təcavüz başlayıb. 1991-ci il sentyabrın 2-də ermənilər Dağlıq Qarabağı “müstəqil dövlət” elan edib, işğalçı müharibə alovlanıb. 1994-cü ildə atəşkəslə dayanan müharibədə Ermənistan Dağlıq Qarabağ vilayətini və onun ətrafındakı bölgələri (Laçın, Kəlbəcər, Qubadlı, Zəngilan rayonlarını tam, Ağdam, Füzuli, Cəbrayıl rayonlarını qismən), eləcə də Qazax rayonunun 7, Naxçıvan Muxtar Respublikasının 1 kəndini işğal edib.
