Almanlar nöqtə qoydu, başqaları…
Münhenin “Bavariya” klubu Almaniya milli futbol çempionatının bitməsinə beş tur qalmış qızıl medallara sahib çıxıb. Novator.az-ın məlumatına görə, 29-cu turda xal sayını 72-yə çatdıran “Bavariya” ən yaxın izləyiciləri üçün əlçatmaz olaraq ölkə çempionu adını qazanıb. Bu, “Bavariya”nın 28-ci çempionluğudur.
“Şalke” 52 xalla ikinci, Dortmund “Borussiya”sı 51 xalla üçüncü pillədə qərar tutub.
Avropanın digər aparıcı futbol ölkələrinə gəlincə, İngiltərə çempionatının lideri postunu 32 oyunda 84 xal yığan “Mançester Siti” tutur. İkinci pillədə dayanan “Mançester Yunayted”in 71 xalı var. “Liverpul” 33 oyuna 67 xalla üçüncüdür.
İspaniya çempionatına başçılıq edən “Barselona” 31 turda 79 xal yığıb. “Atletiko”nun 68, “Valensiya”nın 65 xalı var.
İtaliya çempionatında “Yuventus” 31 oyuna 81 xalla öndədir. “Napoli” 77 xalla ikincidir. Üçüncü pillədə dayanan “Latsio” 60 xal yığıb.
Fransada 32 oyuna 84 xal toplayan PSJ liderdir. “Monako” 70 xal əldə edib. Onu 63 xalla “Lion” izləyir.
