Prezident seçkilərində qələbə faizləri
Aprelin 11-i Azərbaycanda prezident seçkisi keçiriləcək. Bu, ümumxalq səsverməsi ilə səkkizinci prezident seçkisidir.
Novator.az əvvəlki yeddi seçkinin rəsmi nəticələrinə nəzər salıb.
1991-ci il sentyabrın 8-də keçirilən seçkidə Ayaz Mütəllibov təkbaşına mübarizə aparıb, 98,5 faiz səslə qalib gəlib.
7 iyun 1992-ci il seçkisində beş nəfər yarışıb, Əbülfəz Elçibəy 59,4 faiz səslə prezident seçilib.
1993-cü il oktyabrın 3-nə düşən seçkidə üç namizəd olub, Heydər Əliyev 98,8 faiz səslə önə çıxıb.
11 oktyabr 1998-ci il seçkisində altı namizəd mübarizə aparıb, Heydər Əliyev 76,1 faiz səslə qalib gəlib.
2003-cü il oktyabrın 15-də İlham Əliyev səkkiz namizədin iştirak etdiyi seçkidə 76,8 faiz səs alıb.
15 oktyabr 2008-ci il seçkisi yeddi namizədlə keçib, İlham Əliyev 88,7 faiz səslə prezident seçilib.
2013-cü il oktyabrın 9-da keçirilən seçkiyə on nəfər qatılıb, İlham Əliyev 84,5 faiz səslə qalib olub.
11 aprel 2018-ci il seçkisində dövlət başçısı postuna səkkiz namizəd iddia edir: prezident İlham Əliyev, deputatlar Araz Əlizadə, Fərəc Quliyev, Qüdrət Həsənquliyev, Zahid Oruc, Azərbaycan Demokrat Partiyasının sədri Sərdar Cəlaloğlu, Müasir Müsavat Partiyasının sədri Hafiz Hacıyev, siyasətçi Razi Nurullayev.
Azərbaycan 1990-cı ildə prezident idarə üsuluna keçib. İlk prezident – Ayaz Mütəllibov 1990-cı il mayın 18-də parlamentdə seçilib. O, yeganə namizəd olub.
