Yeni prezident səfir postundan getdi
Aprelin 5-də Ermənistan prezidenti Serj Sərkisyan Armen Sərkisyanı Böyük Britaniyada səfir postundan azad edib. Bu, Armen Sərkisyanın dövlət başçısı seçilməsi ilə bağlıdır.
Armen Sərkisyan martın 2-də Ermənistan parlamentində prezident seçilib. Novator.az bildirir ki, yalnız dövlət başçısı funksiyası daşıyan yeni prezidentin 7 illik səlahiyyət müddəti aprelin 9-da başlayacaq. 2008-ci ildən Ermənistan dövlətinə başçılıq edən Serj Sərkisyanın prezidentlik müddəti həmin gün sona çatır. Bununla ölkə tam parlament idarə üsuluna keçəcək, icra hakimiyyətinə baş nazir rəhbərlik edəcək.
Armen Sərkisyan 1953-cü ildə Yerevanda anadan olub. Fizika-riyaziyyat elmləri namizədidir. 1992-1995-ci, 1998-2000-ci illərdə Ermənistanın Böyük Britaniyada səfiri olub. 2013-cü ildən yenidən bu ölkədə səfir idi.
O, müxtəlif illərdə Ermənistanı Avropa İttifaqında, Belçika, Niderland, Lüksemburq və Vatikanda səfir kimi təmsil edib, 1996-cı ilin noyabrından 1997-ci ilin fevralınadək Ermənistanın baş naziri olub.
