Ət yeməyin fəsadları (Yeni tədqiqat)
Böyük Britaniyanın Lids Universitetinin alimləri apardıqları tədqiqatın nəticələrinə əsaslanaraq insanları qırmızı əti az yeməyə çağırır. Mütəxəssislər qeyd edir ki, qida rasionunda qırmızı əti azaltmaqla yoğun bağırsaq xərçənginə tutulma riskini minimuma endirmək olar.
Alimlər tədqiqata İngiltərə, Uels və Şotlandiyadan olan 32 min qadını cəlb edib. Qadınlar 1995-1998-ci illərdə müayinədən keçirilib və orta hesabla 17 il ərzində onların səhhəti izlənib.
Tədqiqat iştirakçıları bu illər ərzində necə qidalandıqları haqda danışıblar. Müayinə zamanı 119 nəfərə yoğun bağırsaq xərçəngi diaqnozu qoyulub. Alimlər yeyinti məhsulları haqda məlumatları xəstəlik statistikası ilə müqayisə edərək belə qənaətə gəliblər: müntəzəm qırmızı ət yeyən qadınlar yoğun bağırsaq və çənbər bağırsağın xərçəngi xəstəliyinə daha çox düçar olublar.
Alimlər hesab edir ki, qida vərdişləri dəyişdirilməsə, 2030-cu ilə qədər dünyada 20 milyon insan bağırsaq xərçənginə tutula bilər. Mütəxəssislər hesab edir ki, meyvə-tərəvəzlə qidalanmaq xərçəngin qarşısını 20% alır.
Səidə Hüseynova
