Nəqliyyata cavabdeh qurumun statusu dəyişdi
Prezident İlham Əliyev fərman imzalayaraq Bakı Nəqliyyat Agentliyinin nizamnaməsini təsdiqləyib. Agentliyin ilkin nizamnamə fondu dövlət büdcəsinin vəsaiti hesabına formalaşır və 1 milyon manat təşkil edir. Qurumun fəaliyyətinə rəhbərliyi həyata keçirmək məqsədilə İdarə Heyəti yaradılır.
Fərmana əsasən, “4 nömrəli Bakı Avtonəqliyyat Müəssisəsi” MMC, “Bakı Sərnişinservis Avtobus Parkı” MMC, “1 nömrəli Bakı Avtonəqliyyat Müəssisəsi” MMC-nin Lökbatan qəsəbəsində yerləşən qarajı Nəqliyyat, Rabitə və Yüksək Texnologiyalar Nazirliyinin balansından Bakı Nəqliyyat Agentliyinin balansına verilir.
Novator.az bildirir ki, Bakı Nəqliyyat Agentliyi paytaxtın inzibati ərazisində yol hərəkətinin təşkilində iştirak edən, ümumi istifadədə olan nəqliyyat vasitələri ilə müntəzəm sərnişindaşıma və taksi minik avtomobilləri ilə sərnişindaşıma sahəsində tənzimləməni və nəzarəti həyata keçirən publik hüquqi şəxsdir.
Qurumun İdarə Heyəti sədrdən və sədrin iki müavinindən ibarətdir. Onların səlahiyyət müddəti 5 ildir, təyinatları prezidentin səlahiyyətindədir.
Bakı Nəqliyyat Agentliyi 2015-ci il dekabrın 21-də Nazirlər Kabineti yanında yaradılıb.
