Əlillərə nə xidmət göstərilib?
Bu ilin yanvar-mart aylarında Əmək və Əhalinin Sosial Müdafiəsi Nazirliyinin qurumları əlilliyi olan şəxslərə 6246 reabilitasiya vasitəsi və protez-ortopedik məmulat verib. Rəsmi hesabata görə, əlilliyi olan şəxslər 300-ə yaxın əlil arabası, 326 aşağı və yuxarı ətraf ortezi, 266 aşağı və yuxarı ətraf, döş protezi, 96 bel və boyun nahiyəsi üçün korset, 1729 müxtəlif reabilitasiya vasitəsi, 360 cüt dirsəkaltı ağac, 277 dördayaqlı dayaq vasitəsi, 207 cüt qoltuqaltı ağac, 635 əsa, 846 cüt ortopedik ayaqqabı, 141 cüt protez ayaqqabı ilə təmin ediliblər. 152 nəfərə stasionar şəraitdə reabilitasiya xidmətləri göstərilib.
Ümumilikdə yanvar-mart aylarında 2672 nəfər əlilliyi olan şəxs müvafiq xidmətlərlə təmin edilib. Onların 376 nəfəri ölkənin ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar əlil olmuş şəxslərdir.
