14 nəfər o zamandan qalır
15 ildir dövlət başçısı olan İlham Əliyev yenidən prezidentliyə namizəddir. Prezident seçkisi aprelin 11-də keçiriləcək.
İlham Əliyev 2003, 2008, 2013-cü illərdə prezident seçilib. 1993-2003-cü illərdə isə onun atası Heydər Əliyev dövlət başçısı olub.
Novator.az bildirir ki, hazırda Nazirlər Kabinetinin üzvü olan 13 nəfər hökumətə Heydər Əliyevin prezidentliyi dövründə gətirilib.
Baş nazir Artur Rasizadə 1996-cı ildən Nazirlər Kabinetindədir, həmin il və 2003-cü ildə bir müddət baş nazirin birinci müavini olub.
Baş nazirin birinci müavini Yaqub Eyyubov hökumətdə 1999-cu ildən təmsil edilir. 2003-cü ilədək baş nazirin müavini postunu tutub.
Baş nazirin müavinlərindən Elçin Əfəndiyev 1993-cü, Abid Şərifov 1995-ci ildən kabinet üzvləridir.
Baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov 1998-ci ildən hökumətdə yer alır.
Daxili işlər naziri Ramil Usubovla mədəniyyət və turizm naziri Əbülfəs Qarayev 1994-cü ildən postdadırlar. Əbülfəs Qarayev 2006-cı ilədək gənclər və idman naziri vəzifəsində işləyib.
Fövqəladə hallar naziri Kəmaləddin Heydərov 1995-ci ildən hökumətdədir. 2006-cı ilədək Dövlət Gömrük Komitəsinin sədri olub.
Fikrət Məmmədov 2000-ci ildən ədliyyə naziri, Hüseynqulu Bağırov 2001-ci ildən ekologiya və təbii sərvətlər naziridir.
Əmək və əhalinin sosial müdafiəsi naziri Səlim Müslümov 2002-ci ildən hökumətdədir. 2013-cü ilədək o, Dövlət Sosial Müdafiə Fondunun sədri vəzifəsində çalışıb.
Diasporla İş üzrə Dövlət Komitəsinin sədri Nazim İbrahimov və Dövlət Sərhəd Xidmətinin rəisi Elçin Quliyev də Nazirlər Kabinetində 2002-ci ildən təmsil olunurlar.
Milli Arxiv İdarəsinin rəisi Ataxan Paşayev isə bu postu 1984-cü ildən tutur.
