Parlament dünyaya səsləndi
Martın 30-da Milli Məclis azərbaycanlıların soyqırımının 100 illiyi ilə bağlı iclas keçirib. Deputat, AMEA-nın Tarix İnstitutunun direktoru Yaqub Mahmudov məruzə ilə çıxış edib. O, 1918-ci il soyqırımının tarixi, ağır nəticələri haqqında danışıb.
Sonda Milli Məclisin bəyanatı qəbul olunub. Report.az-ın məlumatına görə, bəyanatda deyilir: “1918-ci ilin mart-aprel aylarında Bakı Sovetinin mandatı altında fəaliyyət göstərən daşnak-bolşevik silahlı dəstələrinin Azərbaycan xalqına qarşı xüsusi qəddarlıqla törətdiyi soyqırımı cinayətləri, Bakı şəhərində, eləcə də Bakı quberniyasına daxil olan digər şəhər və qəzalarda on minlərlə dinc sakinin məhv edilməsi, yaşayış məntəqələrinin dağıdılması, mədəniyyət abidlərinin, məscidlərin, qəbiristanlıqların yerlə-yeksan edilməsi “Böyük Ermənistan” xülyası naminə erməni şovinistlərinin mərhələ-mərhələ həyata keçirdiyi etnik təmizləmə siyasətinin ən qanlı səhifələrindən biridir. Bakı quberniyasında başlanan kütləvi qətllər və talanlar, daha sonra Qarabağda, Zəngəzurda, Naxçıvanda və İrəvanda və Göyçədə və digər bölgələrdə davam etdirilib. 100 minlərlə azərbaycanlı erməni şovinistlərinin vəhşilik əməllərinin qurbanı olub”.
Bəyanatda Dağlıq Qarabağın və Azərbaycanın başqa torpaqlarının işğalı vurğulanıb. Milli Məclis beynəlxalq təşkilatlara, dünya dövlətlərinə müraciət edərək Azərbaycan xalqına qarşı yeni soyqırımı cinayətlərinə yol verilməməsi üçün Dağlıq Qarabağ münaqişəsinin beynəlxalq hüquq normaları və prinsipləri, dövlətlərin sərhədlərinin toxunulmazlığı və ərazi bütövlüyü prinsipi əsasında ədalətli həllinə kömək göstərməyə çağırıb.
