Hava xəbərdarlıqları
Hava şəraiti ilə bağlı rəsmi xəbərdarlıqlar yayılıb. Ekologiya və Təbii Sərvətlər Nazirliyinin Milli Hidrometeorologiya Departamentinin məlumatına görə, martın 30-u Bakıda və Abşeron yarımadasının bəzi yerlərində arabir yağış gözlənir, güclü şimal-qərb küləyi əsəcək.
Azərbaycanın rayonlarında şimşək çaxacağı, arabir yağış, dağlıq ərazilərdə qar yağacağı, bəzi yerlərdə intensiv olacağı, dolu düşəcəyi bildirilir.
Martın 31-i gündüzədək Abşeron yarımadasında havanın ötən günlə müqayisədə təzadlı dəyişəcəyi, atmosfer təzyiqinin xeyli yüksəlməsi fonunda güclü xəzri küləyinin əsəcəyi və temperaturun 5-10 dərəcə aşağı enəcəyi ehtimal olunur, bu da meteohəssas insanlar üçün çox əlverişsizidir.
Bu rəsmi açıqlamaya əsaslanan Təhsil Nazirliyi tələbə və şagirdləri diqqətli olmağa, xüsusilə azyaşlı məktəb şagirdlərinin valideynlərini dərsə gedən övladlarını nəzarətdə saxlamağa çağırıb. Bakıda və Abşeron yarımadasında fəaliyyət göstərən təhsil müəssisələrinin rəhbərlərindən martın 31-i gündüzədək müvafiq təhlükəsizlik tədbirlərinə xüsusi diqqət yetirmələri xahiş olunub.
Ekologiya və Təbii Sərvətlər Nazirliyinin Ətraf Mühit üzrə Milli Monitorinq Departamenti isə bildirir ki, martın 29-u Bakı və Abşeron yarımadasında tozun miqdarı saat 18-də sanitar normadan 40 faiz yuxarı olub. Səbəb Ərəbistan yarımadasından ölkəyə zəif toz dumanının axmasıdır.
Martın 30-u ölkə ərazisinə daxil olan şimal-qərb küləyi ilə əlaqədar günortadan başlayaraq havada tozun miqdarının azalması proqnozlaşdırılır.
