Bu il 50 milyon manatdan çox güzəştli kredit verilib
İqtisadiyyat Nazirliyinin Sahibkarlığa Kömək Milli Fondu martın 30-u Qusar rayonunun Yuxarı Zeyxur kəndində işgüzar forum keçirib. Rəsmi məlumata görə, fondun icraçı direktorunun müavini Arif Vəliməmmədov forumda deyib ki, 2018-ci ilin ötən dövrü ərzində sahibkarlıq subyektlərinə 50 milyon manatdan çox güzəştli kredit verilib, maliyyələşdirilən layihələrin reallaşdırılması 5100-dən çox yeni iş yerinin açılmasına imkan yaradır.
İşgüzar forum çərçivəsində Quba-Xaçmaz iqtisadi rayonunda fəaliyyət göstərən sahibkarlıq subyektləri 1,2 milyon manat güzəştli kredit alıb. Bu kreditlərin heyvandarlıq və bağçılıq sahələrinin inkişafına, logistik mərkəzin tikintisinə yönəldiləcəyi və 80-dən çox yeni iş yeri açılacağı bildirilir.
Hesabata görə, Quba-Xaçmaz iqtisadi rayonunda fəaliyyət göstərən sahibkarlıq subyektlərinə indiyədək 189,1 milyon manat güzəştli kredit ayrılıb.
Sevinc Kərimli
