Müxalifətin 31 mart mitinqinə razılıq verildi
Bakı Şəhər İcra Hakimiyyəti Demokratik Qüvvələrin Milli Şurası və Müsavat Partiyasının martın 31-nə təyin etdiyi mitinqə razılıq verib.
Mitinq Bakının Yasamal rayonundakı İdman-Sağlamlıq Kompleksinin stadionunda (“İnşaatçılar” metro stansiyasının yanı) olacaq. 2 saatlıq aksiya saat 15-də başlayacaq.
Mitinqin “Azad seçki!”, “Korrupsiyaya yox!”, “Monarxiyaya yox!”, “Siyasi məhbuslara azadlıq!” tələbləri ilə keçirilməsi nəzərdə tutulur. Bu mitinq həm də Bakıda ermənilərin törətdiyi mart qırğınının 100 illiyinə təsadüf edir. Təşkilatçılar bunu nəzərə alaraq aksiyada erməni terrorunu lənətləməyi, beynəlxalq ictimaiyyətdən ermənilərin azərbaycanlılara qarşı soyqırımına hüquqi-siyasi qiymət verilməsini tələb etməyi də qərara alıblar.
Demokratik Qüvvələrin Milli Şurası və Müsavat Partiyası başda olmaqla bir neçə müxalif qurum martın 10-da Yasamaldakı stadionda sanksiyalaşdılmış mitinq keçirib. Aksiyada siyasi və sosial tələblər qoyulub, prezident seçkisinin oktyabrın 17-dən aprelin 11-nə çəkilməsinə etiraz bildirilib.
