Namizədin vaxtı: 7 dəqiqə 30 saniyə
Aprelin 11-də keçiriləcək prezident seçkisində namizədlərə İctimai Televiziya və Radio Yayımları Şirkəti ödənişsiz efir vaxtı ayırır. Novator.az bildirir ki, Seçki Məcəlləsinə əsasən, seçkiqabağı təşviqat üçün ayrılan pulsuz efir vaxtının ümumi həcmi həftədə 3 saatdır (3 saat televiziyada, 3 saat radioda). Pulsuz efir vaxtı namizədlər arasında bərabər həcmdə bölünür.
Seçkiqabağı təşviqat martın 19-dan aprelin 10-u səhər saat 8-dək aparıla bilər. Bu, üç həftə (19-25 mart, 26 mart-1 aprel, 2-8 aprel) efir vaxtı deməkdir.
Televiziya və radioda üst-üstə 6 saat ödənişsiz efir vaxtını (360 dəqiqəni) 8 namizəd arasında bərabər böləndə hər namizədə həftədə 45 dəqiqə efir vaxtı düşür. İctimai Televiziya və Radio Yayımları Şirkəti efir vaxtını həftədə üç dəfə ayırır. Beləliklə, efir günlərində hər namizəd 15 dəqiqə çıxış edə bilər: 7 dəqiqə 30 saniyə televiziyada, 7 dəqiqə 30 saniyə radioda.
Prezidentliyə namizədlər bunlardır: Yeni Azərbaycan Partiyasından dövlət başçısı İlham Əliyev, Sosial Demokrat Partiyasından deputat Araz Əlizadə, Bütöv Azərbaycan Xalq Cəbhəsi Partiyasından deputat Qüdrət Həsənquliyev, müstəqil namizəd, deputat Zahid Oruc, Milli Dirçəliş Hərəkatı Partiyasından deputat Fərəc Quliyev, Müasir Müsavat Partiyasından Hafiz Hacıyev, “Cəbhəçilərin təşəbbüs qrupu”ndan Razi Nurullayev, Azərbaycan Demokrat Partiyasından Sərdar Cəlaloğlu.
Sevinc Kərimli
