İlham Əliyev rusiyalı həmkarına zəng vurub
Prezident İlham Əliyev martın 19-da rusiyalı həmkarı Vladimir Putinə zəng vurub. Xəbəri Azərbaycan prezidentin mətbuat xidməti yayıb.
Rəsmi məlumatda qeyd olunur ki, dövlət başçısı Rusiya prezidentini 18 mart seçkisində qələbə qazanması münasibətilə təbrik edib, ona uğurlar arzulayıb.
İlham Əliyev qeyd edib ki, Rusiya Vladimir Putinin rəhbərliyi ilə müxtəlif sahələrdə böyük nailiyyətlər qazanıb, eyni zamanda Rusiya-Azərbaycan əlaqələri bütün sahələrdə uğurla inkişaf edir. Azərbaycan prezidenti ikitərəfli münasibətlərin bundan sonra da möhkəmlənəcəyinə əmin olduğunu vurğulayıb.
Dövlət başçıları Azərbaycanla Rusiya arasında münasibətlərin perspektivləri ətrafında fikir mübadiləsi aparıblar.
Rusiyada martın 18-də keçirilmiş prezident seçkisində Vladimir Putin 76,7% səslə önə çıxıb, digər 7 iddiaçını xeyli geridə qoyub.
65 yaşlı Vladimir Putin 1996-cı ildən Rusiyanın ali hakimiyyət orqanlarında işləyib, prezidentin işlər müdirinin müavini, Prezident Administrasiyası rəhbərinin birinci müavini, Federal Təhlükəsizlik Xidmətinin direktoru, Təhlükəsizlik Şurasının katibi olub.
1999-cu il avqustun 16-da baş nazir təyin edilib. 1999-cu il dekabrın 31-dən həmçinin prezident vəzifəsini icra edib. 2000-ci ildə prezident seçilib. 2004-cü il seçkisində bu postu əlində saxlayıb.
2008-ci ilin may ayından Rusiyanın baş naziri olub. 2012-ci ildə yenidən prezident seçilib.
