9-cu seçkinin 8 namizədi
Aprelin 11-də keçiriləcək prezident seçkisində 8 nəfərin namizədliyi qeydə alınıb. Novator.az bildirir ki, onların 3-ü Naxçıvan Muxtar Respublikasında, 2-si Bakıda, 1-i Gədəbəydə, 1-i İmişlidə, 1-i Qərbi Azərbaycanda (Ermənistanda) anadan olub. Ən yaşlı iddiaçının 66, ən gəncin 46 yaşı var. 4 nəfər humanitar təhsil, 2 nəfər tibb təhsili, 2 nəfər texniki təhsil alıb.
Araz Əlizadə (66 yaş)
1951-ci il noyabrın 3-ü Bakı şəhərində doğulub.
Bakı Dövlət Universitetinin şərqşünaslıq fakültəsini bitirib.
Azərbaycan Sosial Demokrat Partiyasının sədri, Milli Məclisin deputatıdır.
Sərdar Cəlaloğlu (63 yaş)
1954-cü il iyunun 3-ü Naxçıvan Muxtar Respublikasının Cəhri kəndində (Babək rayonu) anadan olub.
Azərbaycan Tibb Universitetini məhkəmə-tibb eksperti ixtisası üzrə bitirib.
Azərbaycan Demokrat Partiyasının sədridir.
Hafiz Hacıyev (62 yaş)
1956-cı il martın 6-sı Qərbi Azərbaycanın (Ermənistan) Zod kəndində doğulub.
Azərbaycan Dövlət Aqrar Universitetini zoomühəndis ixtisası üzrə bitirib.
Müasir Müsavat Partiyasının sədridir.
İlham Əliyev (56 yaş)
1961-ci il dekabrın 24-ü Bakı şəhərində anadan olub.
Moskva Dövlət Beynəlxalq Münasibətlər İnstitutunun beynəlxalq əlaqələr fakültəsini bitirib.
Yeni Azərbaycan Partiyasının sədri, Azərbaycan Respublikasının prezidentidir.
Fərəc Quliyev (55 yaş)
1962-ci il dekabrın 22-si Naxçıvan Muxtar Respublikasının Üstüpü kəndində (Ordubad rayonu) anadan olub.
Azərbaycan Tibb Universitetinin müalicə işi fakültəsini bitirib.
Milli Dirçəliş Hərəkatı Partiyasının sədri, Milli Məclisin deputatıdır.
Qüdrət Həsənquliyev (52 yaş)
1965-ci il dekabrın 9-u Naxçıvan Muxtar Respublikasının Əbrəqunus kəndində (Culfa rayonu) doğulub.
Bakı Dövlət Universitetinin hüquq fakültəsini bitirib.
Bütöv Azərbaycan Xalq Cəbhəsi Partiyasının sədri, Milli Məclisin deputatıdır.
Razi Nurullayev (46 yaş)
1971-ci il aprelin 1-i İmişli rayonunun Xəlfəli kəndində doğulub.
Azərbaycan Dillər Universitetinin ingilis-fransız dilləri pedaqoji fakültəsini və Cənubi Rusiya Humanitar İnstitutunun hüquq fakültəsini bitirib.
Zahid Oruc (46 yaş)
1972-ci il fevralın 1-i Gədəbəy rayonunun Əli İsmayıllı kəndində doğulub. Qərbi Azərbaycan əsillidir.
Azərbaycan Texniki Universitetinin avtomatika və hesablama texnikası fakültəsini bitirib.
Milli Məclisin deputatıdır.
11 aprel seçkisi Azərbaycanda 9-cu prezident seçkisidir. İlk seçki 1990-cı il mayın 18-i parlamentdə keçirilib. Ayaz Mütəllibov prezident seçilib. O, 1991-ci il sentyabrın 8-də ümumxalq səsverməsi ilə seçkidə də qalib olub.
1992-ci il iyunun 7-də keçirilən prezident seçkisində Əbülfəz Elçibəy, 1993-cü il oktyabrın 3-nə təsadüf edən prezident seçkisində Heydər Əliyev dövlət başçısı seçilib.
1998-ci ilin 11 oktyabrındakı seçkidə Heydər Əliyev postunu əlində saxlayıb.
2003-cü il oktyabrın 15-də, 2008-ci il oktyabrın 15-də və 2013-cü il oktyabrın 9-da keçirilən prezident seçkilərində İlham Əliyev qələbə çalıb.
