Sənaye və sərmayə: yeni göstəricilər açıqlanıb
2018-ci ilin yanvar-fevral aylarında 7,6 milyard manatlıq və ya əvvəlki ilin müvafiq dövrü ilə müqayisədə 1,4 faiz çox sənaye məhsulu istehsal edilib. Novator.az-ın məlumatına görə, Dövlət Statistika Komitəsi bildirir ki, məhsul istehsalı sənayenin qeyri-neft sektorunda 8,4 faiz, neft sektorunda 0,4 faiz artıb.
Sənaye məhsulunun 75 faizi mədən sektorunda, 20 faizi emal sektorunda, 4,4 faizi elektrik enerjisi, qaz və buxar istehsalı, bölüşdürülməsi və təchizatı sektorunda, 0,6 faizi su təchizatı, tullantıların təmizlənməsi və emalı sektorunda istehsal olunub.
Başqa bir hesabata əsasən, yanvar-fevral aylarında ölkənin iqtisadi və sosial sahələrinin inkişafı üçün əsas kapitala yönəldilmiş 1 milyard 824,7 milyon manat vəsaitin 44,7 faizi qeyri-neft sektoruna sərf edilib və bu sektorda investisiyaların həcmi ötən illə müqayisədə 29,8 faiz artıb. Ümumi sərmayənin 74,9 faizi bilavasitə tikinti-quraşdırma işlərinə sərf edilib, vəsaitin 79,3 faizi məhsul istehsalı obyektlərinin, 14,8 faizi xidmət sahələri üzrə obyektlərin, 5,9 faizi yaşayış evlərinin tikintisinin payına düşüb. Daxili mənbələrdən əsas kapitala yönəldilmiş vəsait ümumi sərmayənin 50,8 faizini təşkil edib.
