Kabinet hesabat verib
Martın 16-da Milli Məclis Nazirlər Kabinetinin 2017-ci il fəaliyyətinə dair hesabatını dinləyib. Hesabatı baş nazir Artur Rasizadə təqdim edib.
AZƏRTAC-ın məlumatına görə, baş nazir deyib ki, son 14 ildə Azərbaycanda ümumi daxili məhsul 3,2 dəfə, sənaye istehsalı 2,6 dəfə, əhalinin adambaşına düşən gəliri 7,2 dəfə, əməkhaqqı 6,8 dəfə artıb: “Yoxsulluq səviyyəsi 44,7 faizdən 5,4 faizə enib. Ölkənin strateji valyuta ehtiyatları 26,6 dəfə artaraq 2017-ci ilin sonuna 42 milyard dollar təşkil edib. Ötən illər ərzində 1 milyon 900 mindən çox iş yeri açılıb”.
Baş nazir vurğulayıb ki, neft-qaz sənayesinin aparıcı rolu Azərbaycanın nüfuzunun artmasına töhfəsini verir və digər sahələrin inkişafına kömək edir.
Artur Rasizadə qeyd edib ki, əhalinin təbii qazla təmin edilməsi kimi sosial problemin həlli ilə bağlı davamlı tədbirlər nəticəsində qazlaşdırmanın səviyyəsi 51 faizdən 93 faizə yüksəlib.
Dağlıq Qarabağ münaqişəsinin həlli istiqamətində ciddi dönüşə nail olunmadığını deyən baş nazir ölkənin hərbi gücünün durmadan artdığını vurğulayıb: “Ordumuzu müasir hərbi sursatlarla təmin edirik. Müdafiə sənayesinin inkişafı üçün bu sahəyə ayrılan vəsait 13,5 dəfə artırılıb”.
