Əhalinin gəlir-çıxarı: yeni rəqəmlər
Bu ilin yanvar-fevral aylarında əhalinin gəlirləri 2017-ci ilin müvafiq dövrü ilə müqayisədə nominal ifadədə 10,2 faiz artaraq 7 milyard 700,3 milyon manata çatıb. Dövlət Statistika Komitəsi belə hesabat yayıb.
Rəsmi məlumata əsasən, yanvar-fevral aylarında dövlət büdcəsinə 2 milyard 609,5 milyon manat vəsait daxil olub, büdcədən 2 milyard 469,6 milyon manat vəsait xərclənib, icrada 139,9 milyon manatlıq profisit yaranıb.
Mərkəzi Banka istinadla bildirilir ki, 2018-ci il fevral ayının 1-nə ölkənin bank və bank olmayan kredit təşkilatlarının kredit portfeli milli valyuta ekvivalentində 11 milyard 656,1 milyon manat təşkil edib. Ödəmə vaxtı keçmiş kreditlərin məbləği ümumi kredit portfelinin 14,5 faizinə bərabər olub.
Əhalinin banklardakı əmanətlərinin milli valyuta ekvivalentində məbləği 2018-ci il fevral ayının 1-nə 7 milyard 497 milyon manat göstərilir.
2018-ci ilin yanvar-fevral aylarında kənd təsərrüfatının ümumi məhsulu 3,4 faiz, o cümlədən heyvandarlıq məhsullarının istehsalı 2,6 faiz, bitkiçilik məhsullarının istehsalı ötən ilin müvafiq dövrü ilə müqayisədə 43,8 faiz artıb.
Novator.az-ın məlumatına görə, komitə nəqliyyat sektorunda yük daşınmasının 0,1 faiz azaldığını, sərnişin daşınmasının 1,6 faiz artdığını qeyd edib.
Başqa bir hesabata əsasən, 2018-ci ilin yanvar-fevral aylarında göstərilmiş informasiya və rabitə xidmətlərinin həcmi dəyər ifadəsində 14 faiz artıb.
