Orqan alveri ilə məşğul olan dəstə ifşa edilib
Dövlət Təhlükəsizliyi Xidmətinin ictimai əlaqələr şöbəsi martın 15-də məlumat yayıb. Rəsmi açıqlamaya görə, insan orqanı alveri ilə məşğul olan dəstə ifşa edilib: “İnsan orqanlarının alğı-satqı obyekti olmaması barədə qanunların tələblərinə zidd olaraq orqan alveri ilə məşğul olan, Azərbaycan vətəndaşlarını asılı vəziyyətə salıb qanunsuz tələblər irəli sürən, insanları orqanlarının transplantasiyasına vadar edən transmilli şəbəkənin qanunsuz əməlləri barədə məlumatlar əsasında cinayət işi başlanaraq araşdırmalar aparılır. Vətəndaşlara qarşı müxtəlif cinayət əməllərinin törədilməsi, əlaqəsində olan digər şəxslər, o cümlədən xarici ölkə vətəndaşları ilə birgə Azərbaycan vətəndaşlarının orqanlarının xaricdə transplantasiyası üçün ölkədə alğı-satqısını təşkil edən Azərbaycan vətəndaşı Xudadatov Vahib Fəxrəddin oğlu cinayət məsuliyyətinə cəlb edilib, barəsində həbs qətimkan tədbiri seçilib.
Vahid Xudadatovun əlaqəsində olan şəxslər istintaqa cəlb ediliblər. Cinayət əməlləri nəticəsində orqanları alğı-satqı obyekti olmuş şəxslər həkim nəzarətinə götürülüblər. İstintaq-əməliyyat tədbirləri davam edir”.
