Dördlük bəyannamə qəbul edib
Martın 15-i Bakıda Azərbaycanın xarici işlər naziri Elmar Məmmədyarov, Türkiyənin xarici işlər naziri Mövlud Çavuşoğlu, İranın xarici işlər naziri Məhəmmədcavad Zərif, Gürcüstanın baş nazirinin müavini, xarici işlər naziri Mixail Canelidzenin iştirakı ilə birinci dördtərəfli görüş keçirilib. Nazirlər regional sülh, sabitlik və təhlükəsizliyin gücləndirilməsi, iqtisadiyyat, nəqliyyat, enerji, turizm, mədəniyyət və digər sahələrdə əməkdaşlığın inkişafı məsələlərini müzakirə ediblər.
AZƏRTAC xəbər verir ki, görüşdə Bakı Bəyannaməsi qəbul edilib.
Bəyannamədə qeyd olunur ki, nazirlər regional sülh və sabitliyin möhkəmlənməsində ortaq maraqlarını vurğulayır və bu kontekstdə dövlətlərin suverenliyi, ərazi bütövlüyü və beynəlxalq səviyyədə tanınmış sərhədlərinin toxunulmazlığına qarşılıqlı hörmət, o cümlədən regionda bütün münaqişələrin sülh yolu ilə həlli kimi beynəlxalq hüquq prinsiplərinə sadiqliklərini bildirir.
Sənəddə bütün mümkün sahələrdə dördtərəfli əməkdaşlığın araşdırılması və genişləndirilməsi ilə bağlı razılaşma əldə olunduğu bildirilir.
Nazirlər terrorizm, zorakı ekstremizm və separatizmin bütün forma və təzahürlərinə, transmilli mütəşəkkil cinayətkarlıq, narkotik maddələrin və onların prekursorlarının qeyri-qanuni dövriyyəsi, silah, insan alveri, mədəni və tarixi irsə qarşı cinayətlər, kibercinayətlər və miqrant qaçaqçılığına qarşı mübarizədə əməkdaşlığın gücləndirilməsinə sadiq olduqlarını bəyan ediblər.
